50 år - heile reisa

Foto: HF Reklame

Kåre Neteland

Det startar, som mange gode soger i Hardanger, i ein kjellar.

I 1976 bestemmer røyrleggjar Kåre Neteland seg for at tida er inne. Etter meir enn 20 år i faget – fyrst som mekanikar, deretter som røyrleggjar og arbeidsformann – tek han sats og startar eiga verksemd. Med lager i kjellaren, verktøy i garasjen og kontor i stova, der kona Inger styrer papira, legg han grunnlaget for 50 år med vekst, samarbeid og industriutvikling. Sonen Arve er ein viktig pådrivar for satsinga til Kåre, og han vert raskt ein del av drifta og ein viktig støttespelar for faren.

Kremmarånd
På denne tida er det stor byggjeaktivitet på bustadfeltet i Kvam, og Kåre Neteland får ansvar for mange sanitæranlegg. Sidan det manglar interiørbutikkar i bygda, byrjar Kåre etter kvart å selja kjøken. Valet fell på Sigdal.

Geir – tredje generasjon med nøkkel til butikken
På midten av 80-talet vert tredje generasjon Neteland involvert i verksemda. Geir, barnebarnet til Kåre og i dag ein av eigarane, startar karrieren tidlegare enn dei fleste: Han får ansvar for å halda butikken open, medan Kåre brukar fritida på å byggja familiehytta i Luksund. Det fyrste butikklokalet til Kåre ligg attmed gamle kinoen i Norheimsund.

Som ung gut står Geir bak disken, svarar kundar, hentar varer og lærer meir om drift av butikk enn dei fleste fjortenåringar. Kåre er krystallklar frå fyrste stund: Geir skal verta røyrleggjar. Og Geir ser aldri andre vegar – respekten for handverket er stor og inspirasjonen frå besten endå større.

Tydeleg regissør
Då Geir er komen så langt at han skal velja vidaregåande skule, bestemmer Kåre at barnebarnet må gå på «handel og kontor» på Øystese gymnas. «Skal du driva firma, må du kunna rekneskap», er bodskapen. Geir søkjer og kjem inn. Tredje året må han flytta ut av bygda. Då gjer han som besten vil og byrjar på røyrleggjarlinja i Åsane.

Allereie då han går fyrsteåret, ordnar Kåre lærlingplass til Geir – i ei av dei største røyrleggjarverksemdene i Bergen. Der får Geir fire lærerike år. Han får vera med på store prosjekt og møter andre utfordringar enn heime i Hardanger.

Etter sveinebrevet går han vidare, fullfører meisterbrev i røyrleggjarfaget og får deretter jobb i Bergen.

Geir Neteland

Nytt bygg og ny retning

I 1988 flyttar verksemda endeleg inn i eige bygg i Sandvenhagen. Her vert butikk, verkstad, lager og kontor samla under eitt tak. Denne satsinga markerer eit viktig skifte. Herifrå veks verksemda jamt og trutt, og vert ein naturleg aktør på dei fleste store prosjekt i både Kvam og Jondal. Kåre Neteland AS leverer sanitær- og varmeanlegg til ei rekkje store prosjekt i Kvam og Jondal, og tek på seg store utvendige VA anlegg, mellom anna på Kvamskogen og fleire stader i Kvam. I kjølvatnet av oppdraga fylgjer eit solid, fagleg rykte i heile Hardanger.

Kasta ut på djupet

Hausten 1995 vert Kåre alvorleg sjuk, og familien veit kva som må til: Geir må koma heim. Han seier opp jobben i Bergen og flyttar tilbake til Kvam. Her vert han regelrett kasta inn i drifta. Men Geir ser berre framover. Han vil meir. Han vil ha større prosjekt og ambisjonane er høge. Verksemda må utviklast i takt med framtida.

Under Geir veks røyrleggjarbedrifta til Kåre. Dei vert fleire tilsette og tek på seg store oppdrag lik dei han har erfaring med frå Bergen.

Energi frå sjø – og nye vegar vidare

Kåre Neteland AS satsar på varmepumper og fornybare energiløysingar frå sjø. Samarbeidet med Etec AS gjev verksemda kompetansen som i dag er ein av hjørnesteinane til Tecno VVS.

I Jondal byggjer dei fjernvarmeanlegg frå sjø til sjukeheimen, vidare til barnehagen og seinare skulen. Etter kvart kjem tilsvarande oppdrag i Kvam. Det legg grunnlaget for den tverrfaglege kompetansen som i dag er ein naturleg del av både prosjektering og drift. I 2001 vert også Helge, barnebarnet til Kåre og bror til Geir, ein del av familieverksemda.

Frå familieverksemd til totalteknisk aktør

I 2013 kjøper Kåre Neteland AS ventilasjonsverksemda Kantek AS, og i 2015 vert det etablert felles administrasjon for dei to selskapa.

I 2020 vert alt samla under eitt namn: TECNO VVS AS. Med dette vert konsernstrukturen strammare og satsinga på totaltekniske løysingar endå tydelegare.

Hausten 2018 vert Sander, oldebarn til Kåre, også ein del av familieverksemda. Fyrst er han lærling. Etter nokre år er sveinebrevet i boks. Deretter utdannar han seg til meister i røyrleggjarfaget.

Når kvardagen
vert avisstoff

Å vera røyrleggjar i Hardanger betyr litt av kvart. Det handlar ikkje berre om røyr og ventilar. Av og til hamnar ein i spaltene til lokalavisa, Hordaland Folkeblad, også.

I 1989 braut tjuvar seg inn og stal ein reiseradio og 100 kroner. Dei kom seg inn ved å demontera eit vindauge.

Og under kuldeperioden i 2001 gløda telefonen. Alle røyr i Kvam såg ut til å gje opp samtidig. HF skreiv at firmaet hadde «travle dagar». Det var mildt sagt.

generasjonar Neteland: Inger, Arve, Geir, Helge & Sander. Foto: HF Reklame

I dag – og vidare

Med om lag 60 tilsette og ein sterk lærlingkultur er TECNO VVS i dag ein komplett totalteknisk aktør innan sanitær, varme, sprinklar, ventilasjon, automasjon og blikk. Men sjølv med alt det nye, har verksemda framleis dei same verdiane som i 1976:

Arbeidsglede. Fagstoltheit. Løysingsvilje.

Og evna til å sjå framover – slik Kåre gjorde